نەخۆشییەکی دەگمەنی چەند کۆئەندامێکی لەشە پێکەوە بەهۆی بازدان لە یەکێک لە جینەکانی مرۆڤدا بە ناوی CTNS gene، بەشێوەی بۆماوەیی بەزیو دەگوێزرێتەوە، کە تێیدا ترشە ئەمینی سیستین لە هەندێک شانە و ئەندامەکانی لەشدا وەکو ، گورچیلەکان، چاو، ماسولکە،جگەر، پەنکریاس ومێشکدا کۆئەبێتەوە و کریستاڵ پێکدەهێنێت و بەم شێوەیە زیان بە ئەندام و شانەکان دەگەیەنێت. سیستینۆسس ئەکرێت بە سێ جۆری سەرەکی، کە ئەمانەن :
-nephropathic cystinosis
-intermediate cystinosis
-non-nephropathic (or ocular) cystinosis
نەخۆشییەکە لەنێو هەردوو ڕەگەزدا و لە هەر تەمەنێکدا هەیەوکاتی سەرهەڵدانی نیشانەکانی و تووندییەکەی بەشێوەیەکی بەرچاو لەنێوان تووشبوانی نەخۆشییەکە دەگۆڕێت و لە نەخۆشێکەوە بۆ یەکێکی دیکە جیاوازە.جۆری nephropathic cystinosis لە ساواییەتیەوە بەدەردەکەوێت و لە جۆرەکانی دیکەی توندترە.
لەگەڵ ئەوەشدا زوو ناسینەوە و دەستنیشانکردنی نەخۆشییەکە و زوو دەست بە چارەسەرکردنی کاریگەری بەرچاوی هەیە لە سوککردنی نیشانەکان و ڕێگری لە خراپتربوونی.
چاو و گورچیلە دوو لە باوترین ئەندامی تووشبوون، بەڕادەیەک زۆرێک لەنەخۆشانی تووشبوو پێویستیان بە چاندنەوەی گورچیلە دەبێت.
پشکنینە یەکلایی کەرەوە بۆ دەستنیشانی سستینۆسس :
١-بەرزی ڕێژەی سیستین لە خرۆکە سپییەکانی خوێندا.
٢-پشکنینی جینی CTNS gene ، کە ٪٩٥ یەکلاکەرەوەیە.
٣-دیاریکردنی کلینیکاڵی کریستاڵەکانی سیستین لە کۆرنییەی چاوی نەخۆشەکەدا.
٤-پشکنینەکانی دیکە بەگوێرەی ئەندامە تووشبووەکانی تری ئەیکەیت ، وەک پشکنینی پڕۆتینی میز، پۆتاسیۆمی خوێن، فۆسفاتی خوێن، پشکنینەکانی شەکرە، پشکنینی ترشە ئەمینییەکانی دیکە لە میزدا.